Oh My God!!! 132磅!!!

2009年9月11日
放工到屋企附近商場行街，見到有個磅，於是入錢磅下自己有冇肥到啦，估唔到居然係60 KG，即係132磅！！！ 

我雖然唔係瘦，但對自己都有信心，一定冇132磅咁多囉，肯定係個磅有問題！！ 

深深不忿嘅我一返到屋企即刻攞屋企個磅出黎磅，一如我所料，係瘦左，唔係肥左，個磅居然磅我重左十幾磅！！！所以，各位想控制體重嘅朋友，唔好輕信啲街度嘅磅，一啲都唔準架，真係丫！如果我減緊肥見到呢個數字，真係激死丫！！ 

不過最重要都係我對自己有信心，如果真係信左個超重磅，真係會乜野心機都冇哂，所以話呢，做人一定要信自己！！ 

You will never be alone, Brother!

尋晚出左去參加跑步團，跑左個新路線，完左大概8點鐘左右，返到屋企8點幾9點，成身汗諗住沖涼，點知俾我見到隻不速之客─炎蛇，仲要係BB，得手指尾一半大細，係廁所門口爬下爬下，諗住大力踏地嚇走佢，點知踏多兩下佢竟然索性扮死唔郁，真係唔得佢死，本身都驚驚地炎蛇，唔敢再有進一步行動，唯有以不變應萬變，係廳度睇電視唔理佢，希望佢會自己爬走，過左冇幾耐媽咪放工返黎，見隻野爬到細佬同佢間房中間，就叫我唔好攪隻野由得佢，結果，我目送隻野爬入細佬間房，心諗：「啱啦，爬入去啦，等佢唔好成日一個人!You will never be alone, Brother!」

胃酸過多?

有一段時間早上起身會想作嘔，而且有深色便便，一向怕死嘅我，拿拿聲排街症睇醫生，結果要驗大便兼抽血，17號再覆診，希望有驚無險啦~

白玉蘭

呢隻白色嘅花我經常會路過聞到，陣陣幽香令人心曠神怡，我同佢總會不期而遇，令我對佢念念不忘 ─ 佢係白玉蘭。公園有唔同嘅花，有好多顏色、外形都比佢靚，但論花香就只有佢最標青，我有幸屋企附近都有佢嘅身影，令我每次經過都帶住期待，希望能夠一親芳澤，聞到佢嘅芳香，佢亦好少令我失望，可以有此芳鄰，係生活上添上一點色香味，係人生一小確幸是也!

魚皮花生~

尋日去交便便化驗樣本時，無聊逛超市，發現有魚皮花生賣(華X霹靂魚皮花生，$9.60)，之前係759都有見到其他牌子，但成$10+，覺得有啲貴，冇買到，尋日俾我發現到華潤有賣，即刻買左2包，一包俾爸爸媽咪，一包自己食。

今日拎出來食，兒時記憶湧上心頭，細個返鄉下，係羅湖過關，個陣冇依家咁方便可以有e道，有時可能等好耐，於是係經過羅湖啲賣零食店嘅時候，爸爸通常都會買一兩包魚皮花生，一邊食一邊等。細個媽咪唔鍾意俾我地食零食，所以有得食嘅時候就如獲至寶，記憶中媽咪差不多只有幾次俾我地幾個食過少少薯片，麥記都少食，反而後來自己同大細佬係麥記做PT，自己食多左反而唔太想食，而零食以前不嬲都冇呢舖癮，所以話細個嘅習慣好影響大個嘅健康，依家食多左垃圾野，成日病，反而冇細個咁健康。

就算食零食只係有一排成日想食，依家人到中年，有時都會心郁郁想食下零食，但更多時候想返璞歸真，食返啲有益嘅野，因為真係病到怕左，冇咩事都唔想睇醫生，因為「荷包肝硬化」太嚴重，冇得醫!

柴灣公園雙峰小山坡

以前柴灣公園剛起好冇耐，近天橋處有呢個小山坡，佢原本個樣唔係咁，而係好似兩個乳房嘅山丘，唔知係咪啲人覺得不雅，所以本來「波濤洶湧」嘅山坡，鏟平左變到「風平浪靜」，每次見到都會諗返呢件趣事。😂

原來柑橘類精油係室內會釋出甲醛!!!

原來柑橘類精油係室內會釋出甲醛!!!

研究指出，好多香薰蠟燭含俗稱檸檬油精嘅檸烯，呢種成分本來無害，但濃度高當揮發到空氣之中，會產生化學作用釋出甲醛。
香薰蠟燭可以生產前通過化學物質測試同毒理評估，但作為用家亦要減低 potential health risk。有專家認為可以避選橘子、佛手柑等味道嘅精油，最緊要保持室內空氣流通！