每一些也是情~
2021年7月6日 星期二
2019年5月20日 星期一
You will never be alone, Brother!
尋晚出左去參加跑步團,跑左個新路線,完左大概8點鐘左右,返到屋企8點幾9點,成身汗諗住沖涼,點知俾我見到隻不速之客─炎蛇,仲要係BB,得手指尾一半大細,係廁所門口爬下爬下,諗住大力踏地嚇走佢,點知踏多兩下佢竟然索性扮死唔郁,真係唔得佢死,本身都驚驚地炎蛇,唔敢再有進一步行動,唯有以不變應萬變,係廳度睇電視唔理佢,希望佢會自己爬走,過左冇幾耐媽咪放工返黎,見隻野爬到細佬同佢間房中間,就叫我唔好攪隻野由得佢,結果,我目送隻野爬入細佬間房,心諗:「啱啦,爬入去啦,等佢唔好成日一個人!You will never be alone, Brother!」
2019年5月13日 星期一
2019年5月8日 星期三
魚皮花生~
尋日去交便便化驗樣本時,無聊逛超市,發現有魚皮花生賣(華X霹靂魚皮花生,$9.60),之前係759都有見到其他牌子,但成$10+,覺得有啲貴,冇買到,尋日俾我發現到華潤有賣,即刻買左2包,一包俾爸爸媽咪,一包自己食。
今日拎出來食,兒時記憶湧上心頭,細個返鄉下,係羅湖過關,個陣冇依家咁方便可以有e道,有時可能等好耐,於是係經過羅湖啲賣零食店嘅時候,爸爸通常都會買一兩包魚皮花生,一邊食一邊等。細個媽咪唔鍾意俾我地食零食,所以有得食嘅時候就如獲至寶,記憶中媽咪差不多只有幾次俾我地幾個食過少少薯片,麥記都少食,反而後來自己同大細佬係麥記做PT,自己食多左反而唔太想食,而零食以前不嬲都冇呢舖癮,所以話細個嘅習慣好影響大個嘅健康,依家食多左垃圾野,成日病,反而冇細個咁健康。
就算食零食只係有一排成日想食,依家人到中年,有時都會心郁郁想食下零食,但更多時候想返璞歸真,食返啲有益嘅野,因為真係病到怕左,冇咩事都唔想睇醫生,因為「荷包肝硬化」太嚴重,冇得醫!